IT3(t) verklarings: Wat u moet weet

Click here for ENGLISH

Die Suid-Afrikaanse Inkomstediens (SAID) het die nuwe IT3(t)-indieningsvereistes ingestel as deel van sy voortdurende pogings om deursigtigheid te bevorder en belastingnakoming te verbeter, spesifiek in die trust-omgewing. Hierdie vereistes is daarop gemik om leemtes in die verslagdoening van sekere finansiële inligting, veral dié wat verband hou met uitkerings aan begunstigdes, aan te spreek.

Wat is IT3(t) en hoekom is dit belangrik?

Die IT3(t) is ‘n belastingverklaring wat spesifiek vir trusts ontwerp is. Dit vereis verslagdoening oor finansiële inligting wat verband hou met uitkerings, inkomste en ander transaksies, om akkurate en deursigtige belastingverslagdoening te verseker. Deur hierdie proses het die SAID leemtes in trustverwante inkomsteverslagdoening aangespreek, en daarom is die IT3(t)-verklarings van kritieke belang om te verseker dat alle inkomste en uitkerings behoorlik verantwoord word. Dit dra by tot akkurate inkomstebelasting assesserings en help die SAID om ongerymdhede of weglatings in trustverwante finansiële verslagdoening te identifiseer, wat uiteindelik hul poging om inkomste in te vorder, versterk.

Wie word geaffekteer?

Die vereiste om IT3(t)-verklarings in te dien, is van toepassing op alle trusts wat by die SAID geregistreer is. Trustees, as die wettige verteenwoordigers van die trust, is verantwoordelik vir die indiening van hierdie verklarings. Hierdie verantwoordelikheid strek ook tot enige persoon of entiteit wat optree as administrateur of bestuurder van ‘n trust se finansiële sake.

Belangrike sperdatums

IT3(t)-verklarings vir die 2024-belastingseisoen moet teen 30 September 2024 by die SAID ingedien word. Dit is belangrik om daarop te let dat die sperdatums vir die indiening van hierdie verklarings in toekomstige finansiële jare moontlik strenger sal wees.

Proaktiewe oorwegings vir nakoming

Trustees moet verseker dat die finansiële rekords van die trust deurlopend en behoorlik bygehou word, aangesien finansiële inligting gereed moet wees om aan die nodige verslagdoeningsvereistes te voldoen. Dit verteenwoordig ‘n beduidende verandering in praktyk waar baie trusts voorheen slegs hul jaarlikse finansiële state voorberei het sonder om noodwendig rekeningkundige rekords deurlopend by te hou.

Trustees mag dit oorweeg om trustadministrasiestelsels te implementeer of op te dateer om die insameling en verslagdoening van finansiële data te vereenvoudig.

Dit is noodsaaklik om te verseker dat u trust aan hierdie vereistes voldoen om enige potensiële boetes en onnodige belastingaanspreeklikhede te vermy, veral waar die trust se belasbare inkomste aan begunstigdes uitgekeer word.

IT3(t)-verklarings word via eFiling ingedien, en die IT3-funksionaliteit moet op u trust se eFiling-profiel geaktiveer word voordat die relevante verklarings ingedien kan word. Dit is belangrik dat die trust se geregistreerde besonderhede by die SAID op datum is en dat ‘n “hooftrustee” aangestel is, aangesien ‘n eenmalige PIN (OTP) aan die hooftrustee gestuur sal word, wat nodig is om die IT3-funksionaliteit te aktiveer.

In gevalle waar geregistreerde besonderhede verouderd is of ‘n hooftrustee nog nie aangestel is nie, mag dit nodig wees om ‘n afspraak met die SAID te maak om die relevante inligting op te dateer.

Ten slotte

Trustees moet proaktiewe stappe neem om aan hierdie vereiste te voldoen en te verseker dat trusts aan die SAID se verslagdoeningstandaarde voldoen en potensiële boetes vermy. Om ingelig en voorbereid te bly, sal deurslaggewend wees om hierdie nuwe vereistes suksesvol te navigeer.

Ons is beskikbaar om belastingbetalers by te staan met die voorbereiding en indiening van die relevant IT3(t)-verklarings by die SAID. U is welkom om ons te kontak by tax@asl.co.za indien u verdere inligting benodig.